സെന്‍സെക്സ് തലകുത്തി
രൂപ ഡോളറിനു മുന്നില്‍ റാന്‍ മൂളി
മാര്‍ക്കറ്റ്‌ ഇടിഞ്ഞു , ഓഹരി മറിഞ്ഞു .
ലാപ്ടോപ് അടച്ച്, കണ്ണട ഊരി,
കണ്ണ് തിരുമ്മി, മേശമേല്‍ തലവച്ച്,
തലമേല്‍ കൈവച്ച്, കണ്ണടച്ചിരുന്നു.
എന്നിട്ട്
കൊളുത്ത് പോയ മുഷിഞ്ഞു നരച്ച നിക്കര്‍
വലിച്ചു കേറ്റി
സ്ലേറ്റും പെന്‍സിലും എടുത്ത്
പറമ്പില്‍ നിന്ന് മഷി തണ്ടും പറിച്ചു
സൈക്കിള്‍ ടയറും ഉരുട്ടിക്കൊണ്ട്
പള്ളിക്കൂടത്തിലേക്ക്..
വഴിയില്‍ കണ്ട കാട്ടു മാവിലേക്ക്‌ എറിഞ്ഞ
കല്ല്‌ വീണത്‌ അടുത്ത പറമ്പിലെ കുളത്തില്‍ .
കാറ്റത്ത്‌ വീണ കാട്ടു മാങ്ങ ചപ്പിക്കുടിച്ച്
മാങ്ങാണ്ടി വലിച്ചെറിഞ്ഞു അതിനു കൂട്ടുപോകാന്‍
പറഞ്ഞു കളിയാക്കി അനിയത്തിക്കുട്ടി ..
ആകാശമിരുണ്ട് ഇടി വെട്ടി
മഴ കാണാന്‍ മുകളിലേക്ക് നോക്കിയപ്പോള്‍
കണ്ണിലേക്ക് ഇറ്റു ഒരു മഴത്തുള്ളി.
കണ്ണിലൂടിറങ്ങിയ ചുടു മഴത്തുള്ളി
ലാപ്ടോപ് നനച്ചു.
No comments:
Post a Comment